Como se ven facendo nos últimos cursos o alumnado de 4º vive a experiencia do baloncesto en cadeira de rodas, e neste curso fixémolo o día 10 de abril no Pavillón de Bouzas.
É un deporte minoritario onde o Clube AMFIV (Asociación de Minusválidos Físicos de Vigo) con moito traballo e sacrificio lograron, fai anos, facer un equipo que está na élite do baloncesto en cadeira de rodas, a nivel nacional e internacional.
Nesta sesión puidemos comprobar adestrando con eles o difícil que é este deporte e, ao mesmo tempo, o espectacular que pode chegar a ser despois adestrar como fan eles.
Despois de presentarse os xogadores aprendemos as regras particulares que ten este deporte, interesámonos por distintos aspectos do xogo e continuación fixemos distintos movementos para controlar a cadeira de rodas conxuntamente co balón. Que difícil ao principio! Logo fixemos unha serie de partidiños moi competidos.
O mellor de todo foi que nos decatamos de que aínda que se teña unha deficiencia física, sempre haberá algún deporte que poidamos practicar, con esforzo e capacidade de superación.
FOI UNHA FERMOSA LECCIÓN !
