Xa estamos aquí ... empeza o curso 2011-12

Pois remataron as vacacións e xa estamos de volta, aínda qsue algúns xa pasaron a 5º, pero chegamos nós, os de 3º.

Ao longo deste curso que comeza iremos enchendo os distintos recunchos do noso blogue con fotos, vídeos, actividades ...

Botade unha ollada para ir descubrindo as novidades ou para lembrar actividades ou traballos feitos o curso pasado.

Benvidos ao novo curso!

Chegaron as vacacións

Ben, pois remata o curso e chega o tempo de lecer. Durante o verán teremos tempo para descansar, xogar, ir a praia, de vacacións, gozar da lectura … e tamén para repasar un pouco para que non se nos esqueza o que aprendemos durante este curso que remata. Pasado un tempo podemos ir fixando un horario para estas actividades de repaso, cada un de nós segundo as nosas necesidades. Uns necesitaremos repasar máis mate, outros lingua …

Podemos aproveitar estas propostas de actividades para terceiro e para cuarto como guía para as áreas de lingua e matemáticas.

Non debemos esquecernos dunha actividade que debe ser diaria porque con ela gozamos (unhas veces máis e outras menos) e tamén aprendemos un montón de cousas. Non esquezamos a lectura como fonte de información e pracer.

Gocemos do verán, das vacacións e vémonos o 12 de setembro!

Encontro con Teresa González

Os alumnos e alumnas de 4º recibimos a visita da escritora Teresa González, autora de A filla do ladrón de bicicletas, o libro que estamos a ler.

Esta obra recibiu o premio Merlín de literatura infantil no 2010. O encontro, moi interesante, tivo lugar na biblioteca o día 11 de maio.
Asinou os nosos libros e deixou unha mensaxe coa súa sinatura no libro de visitas de Bibliochans.

A FILLA DO LADRÓN DE BICILETAS on PhotoPeach

Podemos saber máis desta obra e traballar sobre ela facendo esta actividade lim.

Letras Galegas

Chega o 17 de maio, Día das Letras Galegas, data na que lembramos a un escritor ou escritora que escribiu na nosa lingua ou estivo vinculado a nosa cultura. Neste ano lembramos ao poeta de Monforte LOIS PEREIRO.

Nós celebramos as Letras Galegas con moitas actividades: escribimos para a revista A Xanela, participaremos no festival, no Correlingua, sairemos a coñecer o entorno visitando fontes e lavadoiros, para despois participar no acto conxunto de todo o colexio no Torreiro, en  Bembrive.

Na rede podemos informarnos desta importante celebración para a nosa lingua en numerosos enlaces como pode ser o SeminarioGalán, onde ademais podemos facer unha actividade multimedia interactiva sobre Lois Pereiro. Hai tamén actividades para outros ciclos e tamén para Infantil.  A información aparece por etapas_ciclos e este é o vínculo para o noso ciclo. 

Na web da Real Aademia Galega  podemos atopar tamén información sobre a celebración e Lois Pereiro. Tamén neste link hai abundante información e poderemos coñecer o nome e o ano de tódolos homenaxeados-as ata hoxe. 
Na páxina da coordinadora galega de equipos ndl hai abundante información e documentación escrita e audiovisual.
Esta é outra  actividade lim sobre o autor homenaxeado. Unha máis que podemos facer para coñecer un pouco máis a Lois Pereiro.

Para rematar un vídeo da biografía de Lois Pereiro onde tamén escoitaremos unha mostra da súa poesía.

Visitounos Fina Casalderrey

O pasado venres, 29 de abril, achegouse ao noso colexio a escritora Fina Casalderrrey, autora do libro que estamos a ler “O estanque dos parrulos pobres”.

Compartiu con nós experiencias e vivencias e coma sempre foi un encontro agradable, interesante e motivador.

Gozamos moito con ela pois é unha persoa que coa súa conversa fainos soñar e ensínanos o valor das palabras.

O encontro rematou coa firma dos nosos libros  cunha agarimosa aperta.

Estámoslle moi agradecidos a Fina pola súa visita e por escribir eses libros marabillosos que nos fan soñar.

Fina Casalderry - diapositivas

Sericultura - Criamos vermes da seda

Cando chega a primavera, como vimos facendo nos últimos cursos, criamos vermes ou eirugas da seda. Esta actividade, chamada sericultura, orixinouse na China onde tiña un valor comercial xa que a seda era moi apreciada para facer tecidos.

A nós permítenos observar os cambios, a metamorfose, que se produce ao longo do seu ciclo biolóxico que dura uns 60 días, pasando dos ovos a ser bolboretas cun período intermedio dun mes aproximadamente, no que son larvas.
Moitos de nós seguimos coa actividade na casa xa que levamos algúns vermes nunha caixa de cartón e seguímolos coidando.
É unha actividade interesante, entretida e fácil de facer. Só se necesita unha caixa de cartón e ter unha moreira preto da casa xa que as súas follas son o seu único alimento. Non podemos esquecer limpalos retirando os restos de follas e o excrementos.
Para saber máis de sericultura podemos visitar esta páxina con completa información da actividade. Tamén podemos obter información neste sinxelo documento elaborado por nós.

De forma máis gráfica podemos informarnos nestas diapositivas feitas a partir de fotos dos nosos vermes.

Gusaseda - presentacion imagenes

Tamén fixemos esta información coas imaxes de vermes e bolboretas de cursos pasados.

Tivemos a sorte de poder gravar a saída dunha bolboreta do casulo e os primeiros pasos. O vídeo é de baixa calidade pero merece a pena polo momento que rexistrou.

Saída Capela de S. Cibrán - Pouso

Os alumnos e alumnas de 3º estamos a traballar, dentro do proxecto Achégate a Bembrive, sobre a capela de S. Cibarán (3º A) e o Pouso (3º B).  Os primeiros traballos que fixemos foron as follas do almanaque do 2011. Os de 3º A debuxamos a capela na folla do mes de decembro e os de 3º B encargámonos da folla de xullo cun debuxo do Pouso.

Agora traballamos noutras actividades nas que estamos a recoller información sobre os dous lugares. Non podía faltar unha visita para velos con detemento e así o fixemos. Agora xa os coñecemos un pouco mellor  ... pero aínda queremos saber algunha cousa máis  sobre os mesmos. Estamos a traballar!

S. Cibrán - Pouso on PhotoPeach

Fomos ao teatro

Os alumnos e alumnas de 3º e 4º, dentro do programa de actividades para escolares de Novacaixagalicia, fomos ao teatro para ver a montaxe O Forno de Flordelís, da compañía Elefante Elegante.
A obra, dirixida a alumnos de 2º ciclo de Primaria coma nós,  é unha comedia sobre a sociedade de consumo dos nosos días e que nos  convida a reflexionar sobre a forma na que estamos vivindo a nosa vida en sociedade, a forma na que estamos empregando os recursos naturais e o destino que lles reservamos.
A historia transcurre na aldea de Flordelís, onde se vive en plena harmonía. Os habitantes do pobo reúnense ao redor do forno para amasar e cocer un gran pan que será compartido por todos. Mais un día, Madame Lisette, a comerciante, ten a idea de facer un pan só para ela... e por riba... con azucre! Os tempos pracenteiros e a vida comunitaria  van cambiando e os personaxes tórnanse  cada vez máis individualistas. As  vertixinosas ansias de comer lévaos ata un punto en que só quedan dúas posibilidades: parar ou o forno rebentará.
Elefante Elegante aborda esta temática a través do riso, do xesto e da música belga da Valonia en directo.
A obra pareceunos interesante pola súa temática, resultounos moi  entretida e pasámolo moi ben.

Día da Árbore

Os alumnos e alumnas de 3º celebramos o DÍA DA ÁRBORE o 21 de marzo, xusto coa chegaba da primavera. Participamos nunha plantación na zona do Pouso, nos montes da Entidade Menor de Bembrive, que aportou as plantas autóctonas  (carballos e castiñeiros)  e organizou a actividade xunto cos axentes forestais. Primeiro tivemos unha charla informativa sobre a importancia dos bosques, a necesidade de coidalos e a diversidade de seres vivos que neles habitan.

Logo dirixímonos camiñando ata o Pouso acompañados por axentes forestais, observando  a vexetación existente na zona, xa que é o tema que estamos a estudar no proxecto Achégate a Bembrive. Todos amosamos interese pola actividade e participamos activamente na plantación asesorados polos axentes forestais. Pasámolo moi ben, coñecemos un pouco mellor o noso monte, tivemos agasallos e ... xa pensamos en saír outra vez!

Día da Muller Traballadora

Aínda que o Día da Muller Traballadora foi o pasado martes de Entroido, o 8 de marzo, e como estabamos de festa, hoxe celebrámolo na clase de 3º cunha actividade especial. Achegáronse ao colexio dúas das nosas nais, Ana e Cruz, para falarnos dos seus traballos. A actividade resultou  moi interesante e participativa xa que nos trouxeron diverso material relacionado coas súas profesións. Estivemos moi atentos ás explicacións e interesámonos por distintos aspectos da súa actividade laboral. Podemos ver as imaxes do acto en imaxes-sons.

Entroido 2011

O venres, 4 de marzo, celebramos o Entroido no noso cole e o alumnado do segundo ciclo participou elaborando os seus disfraces relacionándoos co tema que están a traballar dentro do proxecto Achégate a Bembrive . Os nenos e nenas de 3º disfrazáronse de árbores o os de 4º de distintos oficios do lugar. Pasámolo moi ben e achegouse ao cole unha morea de familiares do alumnado que gozou con nós desta tradicional festa. Pinchando en Imaxes-sons podemos ver imaxes do noso ciclo. Para ver máis fotos iremos á web do cole ou tamén en Tic-tac Chans.

Chega o Entroido!



É tempo de Entroido, unha festa moi popular en Galicia e de moita tradición. Nenos e nenas están a preparar o disfrace, ensaiando cancións e bailes, facendo carautas e enatefaces ...

Para saber máis podemos entrar nos contidos do portal educativo da Xunta no Especial Entroido.

Se o que queremos é facer un anteface ou carauta, podemos pinchar no enlace e descargar ou imprimir imaxes que deberemos decorar ao gusto de cada quen.

Outros links onde atopar imaxes poden ser dibujalia e tamén yodibujo onde se poderán imprimir as imaxes ou colorealas en liña. Simplemente con escribir en Google imágenes colorear carnaval teremos un montón de imaxes do Entroido.

Recursos multimedia

O Banco de imaxes e sons do ITE (Instituto de tecnoloxías educativas) do Ministerio de Educacón é un importante recurso onde ademais de imaxes e sons podemos atopar ilustracións, animacións e vídeos para as distintas etapas educativas. Podemos empregar o seu buscador ou tamén facelo por coleccións.

Tamén  podemos encontrar contidos similares no Banco multimedia dentro dos contidos do portal educativo da Xunta. Hai galerías de imaxes, sons, animacións e vídeos cun enlace directo para descargar ao noso ordenador.

Seguridade e Internet

Empezaremos escribindo sobre a seguridade cando navegamos por Internet e algúns aspectos importantes a ter en conta. Internet é unha importante fonte de información, onde ademais podemos atopar  ferramentas de comunicación que están presentes na vida cotiá. Non podemos esquecer tamén que na rede non é verdade todo o que vemos ou lemos e que esconde tamén algúns riscos, especialmente para os máis cativos.

Na mesma rede podemos ver distintas informacións sobre o tema. Algúns exemplos poden ser esta guía para seguridade dos menores en Internet, outra de redes sociais, ademais dunha de control parental, todas elas na web do Inteco (Instituto Nacional de Tecnologías de la Comunicación). Para unha maior información visitar a web da OSI (Oficina de seguridad del internauta).